ಹೈದರಾಬಾದ್ ಕರ್ನಾಟಕ ಹೋರಾಟಗಾರ ಅಚ್ಚಪ್ಪಗೌಡ ಸುಬೇದಾರ ಬಗ್ಗೆ ನಿಮಗೆಷ್ಟು ಗೋತ್ತು?


ಹೈದರಾಬಾದ್ ಕರ್ನಾಟಕ ವಿಮೋಚನಾ ದಿನಾಚಾರಣೆ ನಿಮಿತ್ತ ಈ ಲೇಖನ….

ಅಂದು 1947 ಸಮಯದಲ್ಲಿ ಒಂದೆಡೆ ದೇಶ ಪರಕೀಯರ ಅಧೀನದಿಂದ ಮುಕ್ತಿ ಪಡೆದು ಸ್ವಾತಂತ್ರ್ಯದ ವಿಜಯೋತ್ಸವದಲ್ಲಿತ್ತು ಇನ್ನೊಂದೆಡೆ ನಿಜಾಮರ ದಾಸ್ಯದಿಂದ ನರಕ ಯಾತನೆಯನ್ನು ಅನುಭವಿಸುತ್ತಿತ್ತು. ಈ ಪ್ರದೇಶ ಅಂದರೆ ಹೈದರಾಬಾದ್ ಕರ್ನಾಟಕದ ವ್ಯಾಪ್ತಿಗೆ ಒಳಪಡುವ ಕಲಬುರಗಿ, ಬೀದರ್, ಬಳ್ಳಾರಿ, ರಾಯಚೂರು, ಕೊಪ್ಪಳ, ಯಾದಗಿರಿ, ಈ ಪ್ರದೇಶಗಳು ನಿಜಾಮನ ಆಳ್ವಿಕೆಯಲ್ಲಿದ್ದವು. ಅಂದು ಆತನ ಸಾಮ್ರಾಜ್ಯವು ಭಾರತದೊಂದಿಗೆ ವಿಲೀನಗೊಳಿಸಲು ನಿರಾಕರಿಸಿದ್ದಕ್ಕಾಗಿ ಅಂದಿನ ಗೃಹಮಂತ್ರಿ ಸರದಾರ ವಲ್ಲಬಾಯಿ ಪಟೇಲರ ನೇತೃತ್ವದಲ್ಲಿ ಸಾವಿರಾರು ಜನ ನಿಜಾಮರ ವಿರುದ್ಧಸೆಡ್ಡು ಹೊಡೆದು ಹೋರಾಟಕ್ಕೆ ಸಜ್ಜಾದರು. ಅವರ ತ್ಯಾಗ, ಬಲಿದಾನ, ಪ್ರೀತಿ,ಶೌರ್ಯ, ಸಾಹಸ , ಮೆಚ್ಚುವಂಥದ್ದು ನಿಜಕ್ಕೂ ಅದೊಂದು ರೋಚಕದ ಸಂಗತಿ ಪ್ರತಿಯೊಬ್ಬರನ್ನು ಹುಬ್ಬೇರಿಸುವಂತೆ ಮಾಡುತ್ತದೆ ಮುಂದೆ ಆತನ ಸಾಮ್ರಾಜ್ಯವನ್ನು ಭಾರತದ ಒಕ್ಕೂಟದಲ್ಲಿ ವಿಲೀನಗೊಳಿಸಲಾಯಿತು.

ಆ ದಿನವನ್ನು ಹೈದರಾಬಾದ್ ಕರ್ನಾಟಕ ವಿಮೋಚನಾ ದಿನಾಚರಣೆ ಎಂದು ಇಂದಿಗೂ ಆಚರಿಸಲಾಗುತ್ತಿದೆ. ರಜಾಕಾರರ ಹಾವಳಿಯಿಂದ ಜನತೆ ತತ್ತರಿಸಿ ಹೋಗಿ ಸಾವು ನೋವುಗಳನ್ನು ಸಾಕಷ್ಟು ಅನುಭವಿಸಿದ್ದರು. ರಜಾಕಾರರ ಹಾವಳಿಯಿಂದ ಜನರನ್ನು ಪಾರು ಮಾಡಲು ನಿಜಾಮರ ವಿರುದ್ಧ ಟೊಂಕ ಕಟ್ಟಿ ನಿಂತವರಲ್ಲಿ ಸಗರದ ಅಚ್ಚಪ್ಪಗೌಡ ಸುಬೇದಾರರು ಪ್ರಮುಖರು. ಯುದ್ಧ ಭೂಮಿಯಲ್ಲಿ ನಿಜಾಮರ ವಿರುದ್ಧ ಸೆಣಸಾಡಿ ಹೈದರಾಬಾದ್ ಕರ್ನಾಟಕದ ಗೆಲುವಿನ ಕಹಳೆ ಮೊಳಗಿಸಿದವರು ವೀರ ಕೆಚ್ಚೆದೆಯ ಧೀರ ಸಗರದ ಅಚ್ಚಪ್ಪಗೌಡ ಸುಬೇದಾರ್ ಈ ಚಳವಳಿಯ ರೂವಾರಿ ಎಂದು ಹೇಳಬಹುದು.

ಯಾರೀ ಅಚ್ಚಪ್ಪಗೌಡರು

ಅಚ್ಚಪ್ಪಗೌಡ ಸುಬೇದಾರರು ಯಾದಗಿರಿ ಜಿಲ್ಲೆಯ ಶಹಾಪುರ ತಾಲ್ಲೂಕಿನ ಸಗರ ಗ್ರಾಮದ ಶರಣಪ್ಪಗೌಡ ಗಂಗಮ್ಮ ಸುಬೇದಾರ ದಂಪತಿಗಳ ಮಗನಾಗಿ 1925 ಫೆಬ್ರವರಿ 18 ರಂದು ಜನಿಸಿದರು. ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣವನ್ನು ಕಲಬುರ್ಗಿಯಲ್ಲಿ ಮುಗಿಸಿ ಹೆಚ್ಚಿನ ವಿದ್ಯಾಭ್ಯಾಸಕ್ಕಾಗಿ ಹೈದರಾಬಾದಿಗೆ ತೆರಳಿದರು ಹಗಲಿರುಳು ಕಷ್ಟಪಟ್ಟು ಪರಿಶ್ರಮದಿಂದ ಅಭ್ಯಾಸ ಮಾಡಿ ಗ್ರಾಮಕ್ಕೆ ಹಿಂದಿರುಗಿದ ಕೇವಲ 2 ತಿಂಗಳಲ್ಲಿ ಬಂಟನೂರ ಗ್ರಾಮಕ್ಕೆ ಶಿಕ್ಷಕ ವೃತ್ತಿಯನ್ನು ಪ್ರಾರಂಭಿಸಿದರು. ಅಂದಿನ ದಿನಗಳಲ್ಲಿ ಆಂಗ್ಲರ ದಬ್ಬಾಳಿಕೆ ಮತ್ತು ರಜಾಕಾರರ ಗೂಂಡಾಗಿರಿಯ ವಿರುದ್ಧ ಸಿಡಿದೆದ್ದರು ಗಾಂಧೀಜಿಯವರ ತತ್ತ್ವಾದರ್ಶಗಳನ್ನು ಮೈಗೂಡಿಸಿಕೊಂಡು ಅನ್ಯಾಯ ಅಕ್ರಮದ ವಿರುದ್ಧ ಹೋರಾಟಕ್ಕೆ ಸಿದ್ಧರಾದರು ಯಾವ ಯಾವ ಪ್ರದೇಶಗಳಲ್ಲಿ ರಜಾಕಾರರ ದಬ್ಬಾಳಿಕೆ ನಡೆಯುತ್ತಿದೆಯೋ ಅನ್ಯಾಯ, ಅತ್ಯಾಚಾರ ಕೊಲೆ ಸುಲಿಗೆ ಮಾಡುತ್ತಿದ್ದಾರೊ ಅಂತಹ ಗ್ರಾಮಗಳಿಗೆ ಭೇಟಿ ಕೊಟ್ಟು  ಸಮೀಕ್ಷೆ ಮಾಡಿ ಅಲ್ಲಿಯ ನೊಂದ ಜನತೆಗೆ ಸಾಂತ್ವನ ಹೇಳಿ ಅವರಲ್ಲಿ ಧೈರ್ಯ ತುಂಬಿ ಯಾವುದಕ್ಕೂ ಹೆದರಬೇಡಿ ನೀವು ಅವರ ವಿರುದ್ಧ ಹೋರಾಡುವುದಕ್ಕೆ ಸಿದ್ಧರಾಗಿರಿ ಎಂದು ಅವರಿಗೆ ಹುರಿದುಂಬಿಸುತ್ತಿದ್ದರು.

ನೇತಾಜಿಯಂತೆ ವೇಶಭೂಷಣ ತೊಡುತ್ತಿದ್ದ ಅಚ್ಚಪ್ಪಗೌಡರು:

ಅಂದಿನ ಕೆಲ ಯುವಕರು ಹೋರಾಟದ ಮುಂಚೂಣಿಯಲ್ಲಿ ಮನೆ ಬಿಟ್ಟು ಬಂದವರಿಗೆ ಆಶ್ರಯ ಕೊಟ್ಟು ಅವರಿಗೆ ಹಲವಾರು ರೀತಿಯ ಅನುಕೂಲವೂ ಕೂಡ ಮಾಡುತ್ತಿದ್ದರೂ ಅಲ್ಲದೆ ಮಲ್ಲ ವಿದ್ಯೆಗಳಾದ ಕುಸ್ತಿ, ಗುಂಡು ಎತ್ತುವುದು, ಎತ್ತರ ಜಿಗಿತ, ಉದ್ದ ಜಿಗಿತ,ಭಾರ ಎತ್ತುವುದು ಮುಂತಾದ ಸಾಹಸಮಯ ಕೆಲಸಗಳಲ್ಲಿ ತರಬೇತಿ ನೀಡಿ ಯುವ ಪಡೆಯನ್ನು ರೆಡಿ ಮಾಡುತ್ತಿದ್ದರು ಸುಮಾರು 300ಕ್ಕು ಹೆಚ್ಚು ಜನರು ಸ್ವಯಂ ಸೇವಕರನ್ನು ನೇಮಿಸಿಕೊಂಡು ಅವರಿಗೆ ತರಬೇತಿಯನ್ನೂ ನೀಡುತ್ತಿದ್ದರು.

ಅಚ್ಚಪ್ಪ ಗೌಡರ ಬಾಲ್ಯದಿಂದಲೂ ಕ್ರಿಯಾಶೀಲರಾಗಿ ಹಾಗೂ ಅವರ ಆಪ್ತರಾಗಿ ರಾಯಪ್ಪ ಮತ್ತು ಹಣಮಂತ ಯಾವಾಗಲೂ ಗೌಡರ ಜತೆಗಿರುತ್ತಿದ್ದರು ಅವರನ್ನು ಕುದುರೆ ಸವಾರಿ ಶಸ್ತ್ರ ತರಬೇತಿಯಲ್ಲಿ ತೊಡಗಿಸಿಕೊಳ್ಳುತ್ತಿದ್ದರು. ಖಾಕಿ ಟೋಪಿ, ಖಾಕಿ ಉಡುಪು, ಕಾಲಲ್ಲಿ ಬೂಟು, ಕೈಯಲ್ಲಿ ಬಂದೂಕು, ನಿತ್ಯವೂ ಪರೇಡ್ ನಡೆಸುತ್ತಿದ್ದರೂ ನೋಡುವುದಕ್ಕೆ ನೇತಾಜಿ ರೂಪದಲ್ಲಿ ಕಾಣುತ್ತಿದ್ದರು ಅವರ ಮಾತಂತೂ ಮಾಣಿಕ್ಯದಂತೆ ಅವರ ಜೀವನದ ನಡೆನುಡಿಗಳಿಗೆ ಅನುಗುಣವಾಗಿ ಮಾತಿಗೆ ಇಂದು ಗ್ರಾಮೀಣ ಭಾಗದ ಜನಪದ ಮಹಿಳೆಯರ ಒಂದು ಹಾಡಿನ ತುಣುಕು ಇಂದು ನೆನಪಿಸಿಕೊಳ್ಳಲೇಬೇಕು.

“ಪುಂಡಿಯ ಕಟಿಗಾಗ ಕೆಂಡ ಒಗೆದವರ್ಯಾರ ಪುಂಡ ಸಗರದ ಅಚ್ಚಪ್ಪಗೌಡರಾಡಿದ ಮಾತು ಬಂಡಿಗೆ ಕೀಲ ಜಡಿದ೦ಗ”

ಹುಟ್ಟು ಹೋರಾಟಗಾರರಾದ ಅಚ್ಚಪ್ಪಗೌಡ ಸುಬೇದಾರ ಅವರು ಶಿಕ್ಷಕ ವೃತ್ತಿಯನ್ನು ಬಿಟ್ಟು ರಜಾಕಾರರ ವಿರುದ್ಧ ಹೋರಾಟಕ್ಕೆ ಧಮುಕುತ್ತಾರೆ. ಅಲ್ಲಿ ನಡೆಯುತ್ತಿದ್ದ ಬಂಟನೂರು ಕ್ಯಾಂಪಿನ ಮುಂದಾಳತ್ವವನ್ನು ವಹಿಸಿಕೊಂಡು ಕ್ಯಾಂಪಿನಲ್ಲಿ ಬ್ಯಾರಿಸ್ಟರ್ ವೆಂಕಟಪ್ಪ ನಾಯಕ ಮತ್ತು ಅಪ್ಪಾರಾವ್ ವಕೀಲ್ ಹಾಗೂ ಸುಬೇದಾರರು ರಜಾಕಾರರ ವಿರುದ್ಧ ಹೋರಾಟದ ರೂಪುರೇಷೆಗಳನ್ನು ತಯಾರಿಸುತ್ತಾರೆ. ಸ್ವತಃ ಇವರೇ ಸುತ್ತಮುತ್ತಲಿನ ಹಳ್ಳಿಗಳ ಮೇಲೆ ರಾತ್ರೋ ರಾತ್ರಿ ಗಸ್ತು ತಿರುಗುತ್ತಾರೆ ರಜಾಕಾರರ ವಿರುದ್ಧ ನೇರವಾಗಿ ಸಂಘರ್ಷಕ್ಕಿಳಿದು ಅವರೊಂದಿಗೆ ಸೆಣಸಾಡಿ ಏಟಿಗೆ ಪ್ರತಿಯೇಟು ಕೊಡುತ್ತಾ ಕೈಯಲ್ಲಿ ಯಾವಾಗಲೂ ಬಂದುಕು ಸಿಡಿಮದ್ದು ಗುಂಡುಗಳನ್ನು ಹಿಡಿದುಕೊಂಡೇ ತಿರುಗುತ್ತಿದ್ದರು ರಜಾಕಾರರಿಂದ ಲೂಟಿ ಮಾಡಿದ ಹಣ, ದವಸ, ಧಾನ್ಯಗಳನ್ನು ಚಕ್ಕಡಿಯಲ್ಲಿ ಕ್ಯಾಂಪಿಗೆ ಸಾಗಿಸುತ್ತಿದ್ದರೂ ಅವುಗಳನ್ನು ನೊಂದ ಬಡ ಜನರಿಗೆ ಹಂಚುತ್ತಿದ್ದರು ಎಂದು ನಾವು ಚಿಕ್ಕವರಿರುವಾಗ ಅವರ ಆಪ್ತ ಹಾಗೂ ಸ್ವಾತಂತ್ರ್ಯ ಹೋರಾಟಗಾರ ಹಣಮಂತ ಮೊಕಾಶಿ ಎಂಬುವರು ನಮ್ಮ ಮುಂದೆ ಆಗಾಗ ಹೇಳುತ್ತಿದ್ದರು.

ಬಳ್ಳಾರಿ ಉಮರ್ ನ ಹತ್ಯೆ:

ನಿಜಾಮರ ಗುಂಪಿನಲ್ಲಿದ್ದ ಬಳ್ಳಾರಿ ಉಮರ್ ನೆಂಬ ದೈತ್ಯಾಕಾರದ ಗೂಂಡಾಗಿರಿಯ ವ್ಯಕ್ತಿಯ ಕನಸಿನಲ್ಲಿ ಅಚ್ಚಪ್ಪ ಗೌಡರು ಮೊದಲಿನಿಂದಲು ಸಿಂಹಸ್ವಪ್ನವಾಗಿ ಕಾಡಿದ್ದರು. ಗೌಡರನ್ನು ಹತ್ಯೆಗೈ ಯುವುದಕ್ಕೆ ಬಳ್ಳಾರಿ ಉಮರ್ ನೆoಬ ನೀಚ ದೇಶದ್ರೋಹಿ ಆಗಾಗ ಒಳಸಂಚು ರೂಪಿಸಿದ್ದ ಅಲ್ಲದೆ ಸಾಕಷ್ಟು ಬಾರಿ ವಿಫಲನಾಗಿದ್ದ. ಒಂದು ದಿನ ಸಗರ ಗ್ರಾಮದ ಚಾವಡಿಕಟ್ಟೆಯಲ್ಲಿ ಕುಳಿತಿದ್ದ ಗೌಡರ ಮೇಲೆ ಏಕಾಏಕಿ ಹಠಾತ್ತನೆ ಉಮರ್ ದಾಳಿ ಮಾಡಿದ ಗೌಡರನ್ನು ತಲವಾರದಿಂದ ಸದೆ ಬಡಿಯುವುದಕ್ಕೆ ಪ್ರಯತ್ನಿಸಿದ ಗೌಡರು ತಮ್ಮ ಕೈಯಲ್ಲಿರುವ ಖಡ್ಗವನ್ನು ಜಳಪಿಸಿ ಅವನಿಂದ ತಪ್ಪಿಸಿಕೊಂಡು ಉಮರ್ ನ ವಿರುದ್ಧ ಹೋರಾಡುತ್ತಾರೆ. ಅಷ್ಟಾದರೂ ಉಮರ್ ನಿಂದ ಗೌಡರ ಮುಖದ ಮೇಲೆ( ಮೂಗಿಗೆ) ಬಲವಾದ ಏಟು ಬೀಳುತ್ತೆ ರಕ್ತ ಗಾಯಗಳಾಗುತ್ತವೆ. ಅಷ್ಟರಲ್ಲಿ ಗಲಾಟೆ, ಚೀರಾಟ, ಹಾರಾಟ ಹೊಡೆದಾಟವನ್ನು ಗಮನಿಸಿದ ಪಕ್ಕದ ಹೊನಕಲ್ ರ ಕಿರಾಣಿ ಅಂಗಡಿಯ ಗುಮಾಸ್ತನಾದ ಅಡಿವಪ್ಪ ಕೆಂಭಾವಿ ಎಂಬ ವ್ಯಕ್ತಿ ಅಂಗಡಿಯಲ್ಲಿನ ತೂಕದ ಕಲ್ಲಿನಿಂದ ನೇರವಾಗಿ ಗುರಿಯಿಟ್ಟು ಉಮರ್ ನ ತೆಲೆಗೆ ಹೊಡೆಯುತ್ತಾನೆ. ಆಗ ಉಮರನ ತಲೆಗೆ ಬಲವಾದ ಪೆಟ್ಟು ಬಿದ್ದಿದ್ದರಿಂದ ದಿಗ್ಭ್ರಮೆಗೊಂಡು ಆತ ಕಕ್ಕಾಬಿಕ್ಕಿಯಾಗಿ ನಿತ್ರಾಣ ಗೊಳ್ಳುತ್ತಿದ್ದಂತೆ ಪಲಾಯನ ಗಯ್ಯುವುದಕ್ಕೆ ಯತ್ನಿಸುತ್ತಾನೆ. ಆಗ ಅಲ್ಲಿ ನೆರೆದಿದ್ದ ಗ್ರಾಮದ ಜನರು ಅವನನ್ನು ಬೆನ್ನಟ್ಟಿಸಿಕೊಂಡು ಹೋಗಿ ಊರಿನ ಶಂಕರ ನಾರಾಯಣ ಕೆರೆಯಲ್ಲಿ ಜನರ ಕೈಗೆ ಸಿಕ್ಕಿ ಬಿದ್ದು  ಹತ್ಯೆ ಗೈದು ಆತನ ಮೃತದೇಹವನ್ನು ಕಾಲಿಗೆ ಹಗ್ಗ ಕಟ್ಟಿ ಕೆರೆಯ ದಂಡೆಗೆ ಎಳೆದು ತಂದು ಸುಡುತ್ತಾರೆ. ಮುಂದೆ ಗೌಡರನ್ನು ಪಲ್ಲಕ್ಕಿಯಲ್ಲಿ ಹೊತ್ತುಕೊಂಡು ಹತ್ತಿಗುಡೂರು ಮಾರ್ಗವಾಗಿ ಚಿಕಿತ್ಸೆಗೆಂದು ಹೈದರಾಬಾದಿಗೆ ಸಾಗಿಸುತ್ತಾರೆ.

ಬಂಟನೂರು ಕ್ಯಾಂಪ್ ಹಾಗೂ ಹುಣಸಗಿಯ ಸುತ್ತಮುತ್ತಲಿನ ಗ್ರಾಮಗಳಲ್ಲಿ ಇಷ್ಟೆಲ್ಲ ಘಟನೆಗಳು ಜರುಗಿದರೂ ಸುರಪುರದಲ್ಲಿ ಇದರ ಸುದ್ದಿಯೇ ಇರಲಿಲ್ಲ ಎಂಬುದೇ ನೋವಿನ ಸಂಗತಿ ಹೀಗೆ ಸ್ವಾತಂತ್ರ್ಯದ ಸಲುವಾಗಿ ಹೆಂಡತಿ – ಮಕ್ಕಳು, ನೌಕರಿ- ಮನೆ ಬಿಟ್ಟು ಬಂಟನೂರ ಕ್ಯಾಂಪಿನಲ್ಲಿ ಸೇನೆ ಕಟ್ಟಿಕೊಂಡು ನಿರಂತರವಾಗಿ ಹೈದರಾಬಾದ್ ಕರ್ನಾಟಕದ ವಿಮೋಚನೆಗಾಗಿ ಮತ್ತು ಏಳಿಗೆಗಾಗಿ ತಮ್ಮ ಜೀವನವನ್ನೇ ಮುಡುಪಾಗಿಟ್ಟ ಗೌಡರ ನಿರಂತರದ ಹೋರಾಟದ ಜೀವನ ಆದರ್ಶ ತತ್ವಗಳು ಇಂದಿಗೂ ಬದುಕುಳಿದಿವೆ. ಆದರೆ ಗೌಡರ ಹೋರಾಟದ ಪರಿ ಇಂದಿಗೂ ಜನಸಾಮಾನ್ಯರಲ್ಲಿ ಅಚ್ಚಳಿಯದೆ ಉಳಿದಿರುವದು ನಿಜಕ್ಕೂ ಸಂತೋಷದ ಸಂಗತಿ.

ಅಚ್ಚಪ್ಪಗೌಡರ ಜೀವನ ಚರಿತ್ರೆ ಪಠ್ಯ ಪುಸ್ತಕಗಳಲ್ಲಿ ಮೂಡಿಬರಲಿ:

ಸಾರ್ಥಕ ಬದುಕಿನಿಂದ ಬಾಳಿದ ಅಚ್ಚಪ್ಪಗೌಡರು 1983 ಡಿಸೆಂಬರ್ 3 ರಂದು ವಿಧಿವಶರಾದ ಸಗರ ನಾಡಿಗೆ ಬರಸಿಡಿಲು ಬಡಿದಂತಾಗಿ ಕತ್ತಲಾವರಿಸಿದಾಗ ಜನರೆಲ್ಲರೂ ದುಃಖದ ಮಡುವಿನಲ್ಲಿ ಮುಳುಗಿದ್ದರು ಅವರು ಅಗಲಿ 35 ವರ್ಷಗಳು ಗತಿಸಿದರೂ ಅವರ ವೀರಗಾಥೆ ಮಾತ್ರ ಇನ್ನೂ ಜೀವಂತವಾಗಿದೆ ಆದರೆ ಇಂಥ ಮಹಾನ್ ಹೋರಾಟಗಾರರ ಜೀವನ ಚರಿತ್ರೆಯನ್ನು ಸರಕಾರ ಪಠ್ಯಪುಸ್ತಕದಲ್ಲಿ ಅಳವಡಿಸಿ ಅವರ ತತ್ತ್ವಾದರ್ಶಗಳು ಅವರ ಹೋರಾಟದ ಕಿಚ್ಚು ಇಂದಿನ ಯುವ ಪೀಳಿಗೆಗೆ ಅಗತ್ಯತೆ ಇದೆ.

-ಬಸವರಾಜ್ ಸಿಣ್ಣೂರ

Leave a Reply

Your email address will not be published.